taqdir ke darbar mein alqab pade the
hum log magar khwab mein be-khwab pade the

yakh-basta hawaon mein thi khamosh haqiqat
hum soch ki dahliz pe betab pade the

taswir thi ehsas ki tahrir hawa ki
sahra mein tere aks ke girdab pade the

kal raat mein jis rah se ghar laut ke aaya
us rah mein bikhre hue kuchh khwab pade the

wo phul jinhen aap ne dekha tha ada se
ujde hue mausam mein bhi shadab pade the

pachchis baras baad use dekh ke socha
ek qatra-e-kam-zat mein gharqab pade the

hum log to akhlaq bhi rakh aae hain 'sahil'
raddi ke isi dher mein aadab pade the