تسلیم کر رہا ہوں کہ تیرا رقیب ہوں

تسلیم کر رہا ہوں کہ تیرا رقیب ہوں
تو سوچتا تو ہوگا میں کتنا عجیب ہوں
احسان کر رہا ہے ترا ہجر ان دنوں
میں ان دنوں خدا کے زیادہ قریب ہوں


مجھ کو تمہارے عشق نے دی ہیں تسلیاں
کچھ لوگ کہہ رہے تھے میں کتنا غریب ہوں
افسانہ مجھ سے کوئی مکمل نہ ہو سکا
تو جانتا نہیں میں ادھورا ادیب ہوں


اپنی ہتھیلیوں سے یہی پوچھتا ہوں میں
کچھ تو پتہ چلے کہ میں کس کا نصیب ہوں
ممکن ہے اس کے بعد کوئی شے نہ دیکھ پاؤں
میں آج رات چاند کے بے حد قریب ہوں