taswir-e-na-mukammal ek tishnagi ka KHaka

taswir-e-na-mukammal ek tishnagi ka khaka
par phadphada raha hai anqa meri sada ka
sab kyon dikha rahe hain mauhum si kharashen
puchha tha sirf main ne bimar se dawa ka


diwangi nahin jo chhu chhu ke dekhta hun
aankhen hi ab mili hain andha tha main sada ka
hathon ko jaane kab se bas dhoe ja raha hun
sada se canwas par saya sa hai hawa ka


chhedo na in ragon ko shakhen ye phul si hain
marham na mil sakega phir zakhm-e-narawa ka
wahmon ki sau hain shaklen lakdi ke ek ghar mein
kya kya nahin dikhata ye raat ka khataka


ek be-dimagh hathi lashkar se aa mila hai
ab ye dimagh hoga lashkar ke naqsh-e-pa ka