tazim aarti ki hai aadar azan ka hai

ta'zim aarti ki hai aadar azan ka hai
duniya mein ye kamal to hindostan ka hai
gandi siyasaton ne bahaaron ko kha liya
mausam hamare ganw mein ab bhi khizan ka hai


nahaq hi dushmanon ko ye ilzam de diya
gulshan ujadne ka jatan baghban ka hai
tum zalzalon ke khauf se waqif nahin rahe
itna ghurur aaj ye unche makan ka hai


'unwan jo hamari kahani ka tha kabhi
kirdar ab wo aur kisi dastan ka hai
'arshad' nahin hai koi gila ghair se hamein
ghaddar hai to koi isi karwan ka hai