ترے در کی حمایت مل گئی ہے

ترے در کی حمایت مل گئی ہے
مجھے میری ضرورت مل گئی ہے
کہاں پہنچائے گی دنیا کو جانے
ذہانت میں جو وحشت مل گئی ہے


بچھا جاتا ہے بیمار محبت
تڑپنے کی اجازت مل گئی ہے
کھنکتی چوڑیاں دیکھی ہیں جب سے
سماعت میں بصیرت مل گئی ہے


میں بازی ہارنے والا ہوں شاید
حمایت میں حقارت مل گئی ہے
جسے چھو بھی نہیں سکتا ہے کوئی
ہمیں اس کی حفاظت مل گئی ہے


زمانہ اب الگ کر کے دکھائے
محبت میں محبت مل گئی ہے