تیرے دیوانے کو اس طرح ستایا گیا ہے

تیرے دیوانے کو اس طرح ستایا گیا ہے
تیری آواز میں اب اس کو بلایا گیا ہے
میری تصویر کو دیکھا تو کہا لوگوں نے
یار اس کو تو زبردستی ہنسایا گیا ہے


کن کی ماچس سے جلایا گیا تھا ایک دیا
وہ دیا توڑ کے سورج کو بنایا گیا ہے
حاکم وقت کی یہ بات میں سمجھا ہی نہیں
آئنہ خانے میں کیوں اندھوں کو لایا گیا ہے


دل محلے میں مجھے عشق کی دعوت میں میاں
غم کھلایا گیا ہے اشک پلایا گیا ہے
اب تو مفہوم چرا کر ہی غزل کی گئی ہے
یعنی پانی میں بہت دودھ ملایا گیا ہے


دیکھ دشمن نے بتایا ہے تو سچ ہوگا بلالؔ
میرے بارے میں تجھے جو بھی بتایا گیا ہے