ترے احساس کو چھو کر لگا ہے

ترے احساس کو چھو کر لگا ہے
تو میرے پاس ہے اکثر لگا ہے
ہوائیں تک معطر ہیں وہاں کی
جہاں بھی عشق کا منبر لگا ہے


قرار آئے گا میرے جسم کو اب
مرا کانٹوں بھرا بستر لگا ہے
مٹا ڈالا خود اپنے آپ کو تب
محبت میں مرا نمبر لگا ہے


احاطہ کر نہیں پایا میں اس کا
وہ میری سوچ کے باہر لگا ہے
دعائیں بانٹتا ہے ہر کسی کو
شہنشاہوں سے وہ بڑھ کر لگا ہے


ادیبؔ آ جائے نہ خوشیوں کا سورج
شب غم کو اسی کا ڈر لگا ہے