tere firaq mein jab bhi bahaar guzri hai

tere firaq mein jab bhi bahaar guzri hai
hamein rula ke lahu bar bar guzri hai
panah khuda ki hasinon ki bad-mizaji se
meri dua bhi unhen nagawar guzri hai


tamam raat sitaron ke sath roya hun
na puchh kaise shab-e-intizar guzri hai
tera nasib agar tu ne pi nahin zahid
bahaar warna badi pur-bahaar guzri hai


hum apne dard ko roen to kis liye aakhir
shab-e-firaq kise sazgar guzri hai
kisi ki yaad mein hum ko 'naresh' tadpa kar
utha ke hashr nasim-e-bahaar guzri hai