ترے غم کی جب تک سوئی چل رہی ہے

ترے غم کی جب تک سوئی چل رہی ہے
مری زندگی کی گھڑی چل رہی ہے
وفا کے سفر میں اکیلا نہیں ہوں
مرے ساتھ تیری کمی چل رہی ہے


بہت پھول کھلتے ہیں آنکھوں میں میری
ابھی تک پرانی نمی چل رہی ہے
لطیفے سنا اے غزل چپکے چپکے
برابر میں سنجیدگی چل رہی ہے


دھمک ہو رہی ہے خیالوں کی چھت پر
بہت زور سے خامشی چل رہی ہے
قلم کے پھسلنے سے ڈر لگ رہا ہے
محبت ابھی کاغذی چل رہی ہے


میں آیا تھا محفل میں عنوان سن کر
کہانی مگر دوسری چل رہی ہے