ترے غم سے ابھرنا چاہتا ہوں

ترے غم سے ابھرنا چاہتا ہوں
میں اپنی موت مرنا چاہتا ہوں
دھدھکتی آگ ہے سائے میں جس کے
پسینہ خشک کرنا چاہتا ہوں


یہ فن اتنا مگر آساں کہاں ہے
ضرورت بھر بکھرنا چاہتا ہوں
نہیں ڈھونا یہ بوڑھا جسم مجھ کو
سواری سے اترنا چاہتا ہوں


کسی کی نبض پر ہو ہاتھ میرا
علاج اپنا ہی کرنا چاہتا ہوں
تبھی میں مشورہ کرتا ہوں سب سے
جب اپنے دل کی کرنا چاہتا ہوں


خدا جانے اسے کھونے سے شارقؔ
میں ڈرتا ہوں کہ ڈرنا چاہتا ہوں