tere jaisa koi mila hi nahin
kaise milta kahin pe tha hi nahin

ghar ke malbe se ghar bana hi nahin
zalzale ka asar gaya hi nahin

mujh pe ho kar guzar gai duniya
main teri rah se hata hi nahin

kal se masruf-e-khairiyat main hun
sher taza koi hua hi nahin

raat bhi hum ne hi sadarat ki
bazm mein aur koi tha hi nahin

yar tum ko kahan kahan dhunda
jao tum se main bolta hi nahin

yaad hai jo usi ko yaad karo
hijr ki dusri dawa hi nahin