tere kuche mein pahra baDh gaya hai

tere kuche mein pahra badh gaya hai
mere lutne ka khatra badh gaya hai
naqab-e-rukh abhi kuchh aur uthao
meri aankhon ka kharcha badh gaya hai


kisi din aa ke samjhauta kara do
hamara hum se jhagda badh gaya hai
tumhaari saude-bazi ki badaulat
hamara bhaw kitna badh gaya hai


hamari chhoti-chhoti kyariyon mein
zamin-daron ka hissa badh gaya hai
qaside marsiyon mein dab gae hain
chale aao ki qissa badh gaya hai


sabhi diwaren unchi ho gai hain
ab us ke ghar ka saya badh gaya hai
mujhe lagta nahin ye khatm hoga
tere sunne se qissa badh gaya hai