tere liye chale the hum tere liye thahar gae
tu ne kaha to ji uthe tu ne kaha to mar gae

kat hi gai judai bhi kab ye hua ki mar gae
tere bhi din guzar gae mere bhi din guzar gae

tu bhi kuchh aur aur hai hum bhi kuchh aur aur hain
jaane wo tu kidhar gaya jaane wo hum kidhar gae

rahon mein hi mile the hum rahen nasib ban gain
wo bhi na apne ghar gaya hum bhi na apne ghar gae

waqt hi judai ka itna tawil ho gaya
dil mein tere visal ke jitne the zakhm bhar gae

hota raha muqabla pani ka aur pyas ka
sahra umad umad pade dariya biphar biphar gae

wo bhi ghubar-e-khwab tha hum bhi ghubar-e-khwab the
wo bhi kahin bikhar gaya hum bhi kahin bikhar gae

koi kanar-e-abju baitha hua hai sar-nigun
kashti kidhar chali gai jaane kidhar bhanwar gae

aaj bhi intizar ka waqt hunut ho gaya
aisa laga ki hashr tak sare hi pal thahar gae

barish-e-wasl wo hui sara ghubar dhul gaya
wo bhi nikhar nikhar gaya hum bhi nikhar nikhar gae

aab-e-muhit-e-ishq ka bahr ajib bahr hai
taire to gharq ho gae dube to par kar gae

itne qarib ho gae apne raqib ho gae
wo bhi 'adim' dar gaya hum bhi 'adim' dar gae

us ke suluk par 'adim' apni hayat o maut hai
wo jo mila to ji uthe wo na mila to mar gae