teri inayaton ka ajab rang dhang tha
tere huzur pa-e-qanaat mein lang tha

sahra ko raundne ki hawas pa-ba-gil hai ab
yun tha kabhi ki daman-e-afaq tang tha

daman ko tere tham ke rahat badi mili
ab tak main apne aap se masruf-e-jang tha

hangam-e-yaad dil mein na aahat na dastaken
shorish-kade mein raat khamoshi ka rang tha

tu aaya laut aaya hai guzre dinon ka nur
chehron pe apne warna to barson ka zang tha

raqs-e-junun mein bhi tha tariq-e-hunar ka dhab
sufi-e-ba-safa tha koi ya malang tha

kya aasman uthate mohabbat mein jab ki dil
tar-e-nigah mein uljhi hui ek patang tha