teri surat jo dil-nashin ki hai

teri surat jo dil-nashin ki hai
aashna shakl har hasin ki hai
husn se dil laga ke hasti ki
har ghadi hum ne aatishin ki hai


subh-e-gul ho ki sham-e-mai-khana
madh us ru-e-naznin ki hai
shaikh se be-hiras milte hain
hum ne tauba abhi nahin ki hai


zikr-e-dozakh bayan-e-hur o qusur
baat goya yahin kahin ki hai
ashk to kuchh bhi rang la na sake
khun se tar aaj aastin ki hai


kaise manen haram ke sahl-pasand
rasm jo aashiqon ke din ki hai
'faiz' auj-e-khayal se hum ne
aasman sindh ki zamin ki hai