تری طرف سے تو ہاں مان کر ہی چلنا ہے

تری طرف سے تو ہاں مان کر ہی چلنا ہے
کہ سارا کھیل اس امید پر ہی چلنا ہے
قدم ٹھہر ہی گئے ہیں تری گلی میں تو پھر
یہاں سے کوئی دعا مانگ کر ہی چلنا ہے


رہے ہو ساتھ تو کچھ وقت اور دے دو ہمیں
یہاں سے لوٹ کے بس اب تو گھر ہی چلنا ہے
مخالفت پہ ہواؤں کی کیوں پریشاں ہوں
تمہاری سمت اگر عمر بھر ہی چلنا ہے


کوئی امید نہیں کھڑکیوں کو بند کرو
کہ اب تو دشت بلا کا سفر ہی چلنا ہے
ذرا سا قرب میسر تو آئے اس کا مجھے
کہ اس کے بعد زباں کا ہنر ہی چلنا ہے