تو مری کھوئی نشانی کے سوا کچھ بھی نہیں

تو مری کھوئی نشانی کے سوا کچھ بھی نہیں
میں تری یاد دہانی کے سوا کچھ بھی نہیں
بند کمروں میں مکیں سوتے ہیں اور آنگن میں
میرے اور رات کی رانی کے سوا کچھ بھی نہیں


یہ تجھے ایک نظر دیکھنے والوں کا ہجوم
میری ناپختہ بیانی کے سوا کچھ بھی نہیں
جو اترتا ہے وہ بہتا ہی چلا جاتا ہے
گویا دریا میں روانی کے سوا کچھ بھی نہیں


جتنے چہرے ہیں وہ مٹی کے بنائے ہوئے ہیں
جتنی آنکھیں ہیں وہ پانی کے سوا کچھ بھی نہیں