tujhko aawaz se samjhun ki bayan se dekhun

tujh ko aawaz se samjhun ki bayan se dekhun
mo'atabar kya hai bata tujh ko kahan se dekhun
aab-dida hun main khud zakhm-e-jigar se apne
teri aankhon mein chhupa dard kahan se dekhun


is khuli aankh pe khulte nahin asrar tere
tu chhupa hai to tujhe chashm-e-nihan se dekhun
main ne chaha tha sanam ban ke tu aankhon mein rahe
tu ne chaha main tujhe chashm-e-butan se dekhun


har taraf tir baraste hain nishana main hun
laut aati hai nazar khud pe jahan se dekhun
is tarah dil mein utar ja na rahe kuchh baqi
tu hi tu ho meri nazron mein jahan se dekhun