tujhse wabasta hun nashad nahin ho sakta

tujh se wabasta hun nashad nahin ho sakta
tere hote hue barbaad nahin ho sakta
surkh-rui mere hissa mein junun se aai
ab koi dusra farhad nahin ho sakta


par katarta hai na zindan ki saza deta hai
qaid mein jis ki hun sayyaad nahin ho sakta
pichhle asbaq jo azbar the unhen bhul gaya
ab naya koi sabaq yaad nahin ho sakta


yahi behtar hai ki bujh jae sar-e-sham charagh
dil-e-nashad agar shad nahin ho sakta
ye makan us ka hi hai kaun-o-makan jis ke hain
kya kharaba kabhi aabaad nahin ho sakta