تم ہمارے قریب آنے کو

تم ہمارے قریب آنے کو
کرتے رہتے ہو خوش زمانے کو
اس کے کوچے کا فرش پکا ہے
ہاتھ ملتا ہوں خاک اڑانے کو


چلنا پھرنا کوئی ضروری نہیں
اس کی محفل میں آنے جانے کو
جب کہ میں نے سمجھنا چھوڑ دیا
وہ تلا ہے سمجھ میں آنے کو


اسے کیسے بھلائے کوئی جسے
یاد کرنا پڑے بھلانے کو
تم تو سب کچھ بتائے دیتے ہو
کچھ بچا کر رکھو چھپانے کو


اس نے کچھ دیر سن لیا ورنہ
کون سنتا مرے فسانے کو
تیری موجودگی میں کم سے کم
جی تو کرتا ہے مسکرانے کو