tumhaare hijr ki muddat ghata rahi hun main
ghadi mein waqt ko ulta ghuma rahi hun main

kitab-e-zindagi main ne agar padhi hi nahin
kyon imtihan ka parcha bana rahi hun main

lagai main ne kinare par aansuon ki sabil
nadi ki pyas ko pani pila rahi hun main

yahi ki dil ki suni hai dimagh se pahle
saza usi ki mohabbat mein pa rahi hun main

suna hai aur ziyaada sitam karega tu
so apne zabt ki taqat badha rahi hun main

laga ke ek alag zakhm us ke pahlu mein
tumhaare zakhm ko nicha dikha rahi hun main