tum ne gar mujh ko kabhi dil se pukara hota
phir bulandi pe mohabbat ka sitara hota

mere hathon mein agar hath tumhaara hota
kitna dilkash wo meri jaan nazara hota

bas takhayyul hai teri yaad hai tanhai hai
kash aise mein mujhe tu ne pukara hota

apne mahbub ki bas ek jhalak pane ko
yar bechain kabhi dil na hamara hota

tu jo mil jata to mil jatin jahan ki khushiyan
tera har zulm-o-sitam mujh ko gawara hota

tishnagi honton pe hoti na nami aankhon mein
waqt-e-akhir jo agar sath tumhaara hota