udas rahne ko to sab udas rahte hain

udas rahne ko to sab udas rahte hain
meri tarah se magar kab udas rahte hain
dikhai dena ho jab khush to kyon udas rahen
udas rahna ho jab tab udas rahte hain


purane dhang se kal hum udas rahte the
nae tariqe se hum ab udas rahte hain
sahar-ta-sham bahut khush dikhai den bhi to kya
utarne lagti hai jab shab udas rahte hain


kisi ko rahne nahin deti hai ye duniya khush
udasi ki hai ye maktab udas rahte hain
udas rahna bhi khush rahne ke barabar hai
samajh mein aa gaya ye jab udas rahte hain


ye chand aur sitare ye phul aur jugnu
'kamal' us ke liye sab udas rahte hain