اداسیوں کے سوا اس مکان میں کیا ہے

اداسیوں کے سوا اس مکان میں کیا ہے
تمہارے بعد مری داستان میں کیا ہے
تم اس لئے بھی مخالف رہے ہواؤں کے
تمہیں پتہ ہی نہیں آسمان میں کیا ہے


نگاہ ٹکتی نہیں کیوں کسی بھی چہرے پر
خدا ہی جانے تمہارے گمان میں کیا ہے
زمیں سے اٹھ کے خلا میں کہیں بھٹک جانا
ضرورتوں کے علاوہ اڑان میں کیا ہے


بس اک جنون سمندر میں غرق ہونے کا
نہیں تو اور ندی کے اپھان میں کیا ہے
تمام عمر جلا ہوں تپش میں سورج کی
یہ مجھ سے پوچھے کوئی سائبان میں کیا ہے