ufuq ko surKH kiya aasman zard kiya

ufuq ko surkh kiya aasman zard kiya
bahae ashk to suraj dubo ke sard kiya
sinan ki nok pe la kar rakhe mah-o-mirrikh
phir us ke ba'd sitaron ko gard gard kiya


jo rukh badal ke pari-zad ne padha mantar
palak jhapakte mein ek sabz bagh zard kiya
tilism-e-qulzum-o-aswad ko tod kar us ne
padao apna sar-e-koh-e-laj-ward kiya


bas ek jast zamini jihat tod gai
aur ek qadam ne use aasman-naward kiya
'ajab ghadi thi ki jamne laga ragon mein lahu
jo be-dili ne hamein tegh-e-be-nabard kiya