افق کو سرخ کیا آسمان زرد کیا

افق کو سرخ کیا آسمان زرد کیا
بہائے اشک تو سورج ڈبو کے سرد کیا
سناں کی نوک پہ لا کر رکھے مہہ مریخ
پھر اس کے بعد ستاروں کو گرد گرد کیا


جو رخ بدل کے پری زاد نے پڑھا منتر
پلک جھپکتے میں اک سبز باغ زرد کیا
طلسم قلزم و اسود کو توڑ کر اس نے
پڑاؤ اپنا سر کوہ لاجورد کیا


بس ایک جست زمینی جہات توڑ گئی
اور اک قدم نے اسے آسماں نورد کیا
عجب گھڑی تھی کہ جمنے لگا رگوں میں لہو
جو بے دلی نے ہمیں تیغ بے نبرد کیا