اجڑے ہوئے رستے ہم

اجڑے ہوئے رستے ہم
گزرے ہوئے لمحے ہم
رنگوں سے مزین تھے
چھو لینے سے بکھرے ہم


نابود مکمل کر
ٹوٹے نہیں چٹخے ہم
سیراب ہوئی دنیا
اک بوند کو ترسے ہم


دے دیں اسے غیروں کو
دنیا ترے صدقے ہم
اپنی بڑی قیمت تھی
کتنے ہوئے سستے ہم


اس آنکھ میں گھر ہوتا
اس دل میں دھڑکتے ہم
ہم بچھڑی ہوئی بانہیں
بھولے ہوئے لمحے ہم


لپٹی ہوئی فکریں ہیں
کہتے نہیں دکھڑے ہم
حجت بھی اگر کرتے
کس شخص کے کرتے ہم


اے یاد چل آہستہ
گونگے ہیں نہ بہرے ہم