ulfat ka anjam bura hai
dana achchha dam bura hai

shaikh achchhe hain aur bure hum
bad achchha badnam bura hai

shaikh ke munh mein pand-o-nasihat
mai achchhi hai jam bura hai

is duniya mein aksar dekha
jurm achchha ilzam bura hai

hirs ki baaten karne walo
is shai ka anjam bura hai

ahd-e-wafa par marne walo
mat karna ye kaam bura hai

wasl ka wada kar ke bole
ab kahiye paigham bura hai