ان آنکھوں میں عکس کبھی تو اپنا دیکھ نہ پائے گا

ان آنکھوں میں عکس کبھی تو اپنا دیکھ نہ پائے گا
اس حسرت میں اے دل اک دن پتھر کا ہو جائے گا
شہزادوں کی پریم کہانی افسانہ بن جاتی ہے
تیری میری باتیں پگلی کون یہاں دہرائے گا


اپنی محفل جمتی ہے اب شہر کے کافی ہاؤس میں
گاؤں کی چوپال پہ آ کر کون الاؤ لگائے گا
عشق نگر میں رہنے کے آداب ضروری ہوتے ہیں
پہلے تم کو خاموشی کا راگ سنایا جائے گا


اتنا بھی بے کار نہ سمجھو یاد ماضی کو نادرؔ
یہ تنکا ہی ایک نہ اک دن دریا پار کرائے گا