un ki aaraish se mere kaam ban jaenge kya
dil ki gutthi shana-ha-e-zulf suljhaenge kya

wasl ke wade se khush ho kar na mar jaenge kya
nama-bar hansta hua aata hai khud aaenge kya

qaidi-e-gham turbaton mein aur un ko ye khayal
katne mein ek shab-e-furqat ke mar jaenge kya

kaam apna kar chuke ahl-e-wafa shak hai to ho
sar nahin baqi shahidon ke qasam khaenge kya

arz-e-matlab ke liye ai dil zaban khulti nahin
kuchh ishaare main karunga wo samajh jaenge kya

hath idhar uthta nahin hai tar udhar baqi nahin
denge wo kya aur hum daman ko phailaenge kya

qissa-e-farhad-o-majnun kyun sunate ho hamein
jab pareshani se matlab hai to ghabraen kya

mehman-e-ku-e-jaanan ho ke dil betab hai
main to samjhata nahin wo bhi na samjhaenge kya

mast rahte hain hamesha mai-faroshan-e-jamal
hum to mangenge koi saghar wo farmaenge kya

kyun na chup baithun qafas mein dur hi fasl-e-bahaar
aah-o-zari se meri mausam badal jaenge kya

tinke tinke ka khuda-hafiz chale hum bagh se
alwidaa ai aashiyan ab ja ke phir aaenge kya

dil ki bimari ka uqda kholna dushwar hai
jo nahin samjhe wo 'saqib' mujh ko samjhaenge kya