us se kahun main haal-e-dil-e-dagh-dagh kya
hans kar jo ye kahe ki sajaya hai bagh kya

qabr ek khush-nasib ki phulon se at gai
yaron ke aansuon ne jalae charagh kya

wo multafit nahin hain to kya lutf-e-mai-kashi
ab hain nazar mein hech subu kya ayagh kya

wo mehrban na hon to khushi ka kise dimagh
dil mutmain na ho to gham-e-sair-e-bagh kya

shabnam ke girya se mera pahuncha kahan khayal
ghuncha hai sina-e-chamanistan ka dagh kya

'fitrat' mizaj-e-sher ki garmi na puchhiye
do sher kah ke jalne laga hai dimagh kya