us ke honton pe mera nam jo aaya hoga
sharm se chehre ko hathon se chhupaya hoga

meri aamad ka khayal un ko jo aaya hoga
to munderon pe charaghon ko jalaya hoga

us ki palkon pe larazte hue jugnu honge
qissa-e-‘ishq kisi ko jo sunaya hoga

us ne dekha jo na hoga sar-e-mahfil mujh ko
apni namnak si palkon ko jhukaya hoga

dastaken khwab mein darwaza-e-dil par de kar
meri nindon ko hansi us ne banaya hoga

justuju karte hue thak gae honge 'rizwan'
mod aisa bhi rah-e-'ishq mein aaya hoga