اس کی محبتوں کا طریقہ کچھ اور ہے

اس کی محبتوں کا طریقہ کچھ اور ہے
کہتا وہ مجھ سے اور ہے کرتا کچھ اور ہے
جو اس پہ بیتتی ہے وہ معلوم ہے مجھے
جب اس سے پوچھتا ہوں بتاتا کچھ اور ہے


وہ بھی سمجھتا ہے کہ جدا کیوں ہوئے ہیں ہم
یہ میں بھی جانتا ہوں کہ قصہ کچھ اور ہے
پنچوں کی بات مان لیں کس طرح ہم کہ جب
میرے اور اس کے درمیاں جھگڑا کچھ اور ہے


اس کے بغیر چین بھی پڑتا نہیں جسے
سمجھاتا اور کچھ ہوں سمجھتا کچھ اور ہے
کر اے غزال عشق مرے شہر دل کی سیر
صحراؤں میں غبار اڑانا کچھ اور ہے


یاروں سے ملتے جلتے رہا کیجیئے جمالؔ
یاروں کے بیچ ان دنوں چرچا کچھ اور ہے