utra jo iltifat ka dariya na tha kabhi

utra jo iltifat ka dariya na tha kabhi
dil is qadar bhi hijr ka mara na tha kabhi
sarmaya-e-hayat the farda ke khwab so
likha bisat-e-jaan pe khasara na tha kabhi


bikhra wo khak ho ke meri rahguzar mein
jo shakhs aa ke khwab mein milta na tha kabhi
tanhai khauf ye shab-e-dijur ye ghutan
guzregi aise qabr mein socha na tha kabhi


ek aan mein ye paikar-e-khaki bikhar gaya
ye saneha to ruh pe guzra na tha kabhi
mastur tha hijab-e-taqaddus mein soz-e-ishq
aawaza-e-khiram-e-tamanna na tha kabhi


nasur ban ke ruh ko ghayal kiye gaya
jo ashk chashm-e-nam ne giraya na tha kabhi
to ye na justuju hai na zauq-e-junun-e-ishq
viran aisa shahr-e-tamanna na tha kabhi


'anjum' ye shab-gazida sahar kyun nasib mein
main ne charagh-e-shauq bujhaya na tha kabhi