visal-e-yar mein hain sar-KHushan gulab ke phul

visal-e-yar mein hain sar-khushan gulab ke phul
umad pade hain yahan se wahan gulab ke phul
sharab jugnu hawa titliyan gulab ke phul
sabhi farefta-dil aashiqan gulab ke phul


laraz rahe hain shafaq par mohabbaton ke khumar
bikhar rahe hain sar-e-be-karan gulab ke phul
dayar-e-yar mein khulne lage bahaar ke rang
khayal-e-yar mein nikhat-fashan gulab ke phul


rakhe hain kante bhi hum ne 'aziz-tar lekin
khuda kare ki na hon bad-guman gulab ke phul
chaman mein daliyan labrez hain umangon se
kahin pe sukh gae be-nishan gulab ke phul


rawish rawish mein utar aae hain misal-e-bahisht
sanbhal rahe hain liye tahniyan gulab ke phul
farishte dhundte rahte hain aasmanon mein
falak se aaen zamin par yahan gulab ke phul


kahan kahan na uthe hain shabab ke fitne
raqam karen wo nai dastan gulab ke phul
bhari hui hain bahaaron ki jholiyan 'barham'
meri lahad pe giren mehrban gulab ke phul