waiz-e-tund-KHu ko de baada-o-jam saqiya

waiz-e-tund-khu ko de baada-o-jam saqiya
taki wo hosh mein kare tujh se kalam saqiya
sare khatib shahar ke tere khilaf ho gae
tera nasib ho gai shohrat-e-am saqiya


hum ko bhi kuchh pata chale bazm mein kaun kaun hai
aaj ata-e-jam ho nam-ba-nam saqiya
tu ne kaha to ro diye tu ne kaha to hans diye
shahar ke sare baada-kash tere ghulam saqiya


dasht tujhe dikhaenge khak teri udaenge
ahl-e-junun ne likh liya tera bhi nam saqiya
hum ne suna hai tera bhi chaaragaron mein nam hai
tujh se padega ek din hum ko bhi kaam saqiya


daftar-e-kotwal mein likkha hua hai aaj-kal
tera bhi nam saqiya mera bhi nam saqiya