وجہ خلش ہے باعث آسودگی بھی ہے

وجہ خلش ہے باعث آسودگی بھی ہے
یہ بعد جس میں لذت ہمسائیگی بھی ہے
کچھ دشت کے بگولے بھی ہیں باعث فشار
کچھ خود مزاج خاک میں آوارگی بھی ہے


بستی کوئی عجیب ہے یہ اس جگہ کے لوگ
خندہ بہ لب ہیں چہروں پہ آزردگی بھی ہے
ویسے بھی کچھ یہاں سے طبیعت ہے اب اچاٹ
یوں دل کو اس دیار سے وابستگی بھی ہے


اس اپنی گوشہ گیری کے ہیں اور بھی سبب
اک وجہ پست ہمتوں کی خواجگی بھی ہے
وہ آتشیں کرہ ہے یہ دل جس کے ہر طرف
تاریکیٔ خلا بھی ہے یخ بستگی بھی ہے


پھر مجھ سے قوم کرتی ہے کیوں معجزے طلب
جب طعن سحر و تہمت دیوانگی بھی ہے
موجودگی تری متعین نہ ہو سکی
اے تو کہ ہر جگہ تری موجودگی بھی ہے


کیا کیجئے بشیرؔ شعور انا کے ساتھ
حکم سجود و عاجزی و بندگی بھی ہے