waqt ka intiKHab hain hum log

waqt ka intikhab hain hum log
kitne izzat-maab hain hum log
hadse hum pe naz karte hain
har bala ka jawab hain hum log


hum se milti hai raushni sab ko
waqt ka aaftab hain hum log
hum ne tufan ke rukh bhi mode hain
dekhne mein habab hain hum log


hum ne likkha hai pyar ka dastur
aashti ki kitab hain hum log
khud ko patthar bana liya hum ne
tere dil ka jawab hain hum log


tu hamare dilon ki dhadkan hai
teri aankhon ka khwab hain hum log
chashm-e-yaran mein khar hain lekin
dar-haqiqat gulab hain hum log


hum ko duniya 'nazir' kuchh bhi kahe
aap apna jawab hain hum log