wo bahut be-qarar hai shayad

wo bahut be-qarar hai shayad
us ko bhi intizar hai shayad
nafraten sar se panw tak dekhin
dil mein thoda sa pyar hai shayad


kar ke tai marhale udas tha wo
jit mein us ki haar hai shayad
zindagi aakhiri thikane par
qabil-e-e'tibar hai shayad


gham bhi phal phulta hai aae din
shajar-e-saya-dar hai shayad
mere rone pe koi baat na ki
aaj wo sogwar hai shayad


guftugu mein na mujh se jit saka
is liye sharmsar hai shayad
jis ko dekhun wo girta padta hai
har taraf intishaar hai shayad


kaj-kulahi tumhaari 'iraj' ji
bais-e-iftikhar hai shayad