wo barha hi unhin raston pe chalte hain

wo barha hi unhin raston pe chalte hain
'ajib log hain gir kar nahin sanbhalte hain
maqam apna badalti nahin koi manzil
safar mein log kai raste badalte hain


lagate hum pe hain ilzam bewafai jo
wo qatl kar ke bhi be-dagh bach nikalte hain
chale hain jo bhi yahan 'azm-e-raushni le kar
charagh un ki umidon ke roz jalte hain


wahi hai dil wahi duniya wahi masail hain
so hum unhin se bichhad kar unhin se milte hain
qadam uthe to usi samt rukh raha un ka
mohabbaton ke jahan raste nikalte hain