wo din bhi aae ki hum ye ajib khana khaen

wo din bhi aae ki hum ye 'ajib khana khaen
amir khana pakaen gharib khana khaen
wo shab kahan ki khule us badan ka dastarkhwan
aur us ke sath mein hum khush-nasib khana khaen


hum ahl-e-'ishq dukan-e-hawas pe jaen na kyon
jab us ki da'wat-e-dil mein raqib khana khaen
tamam shahr hai faqe se aur ghazab dekho
amir-e-shahr aur us ke habib khana khaen


koi to aae jo naqqad ka walima karae
ki ek din to ye sha'ir adib khana khaen
yahi hai 'ishq ki jab gul karen shikam-seri
to us ke dusre din 'andalib khana khaen