wo hirasat mein jo insan liye jate hain

wo hirasat mein jo insan liye jate hain
apni tafrih ka saman liye jate hain
kal jise ghar se utha le gai khaki wardi
aaj man-bap use shamshan liye jate hain


baad muth-bed ke tamghe ye taraqqi dekho
marne wale hi ka ehsan liye jate hain
jism chhalni hai magar hath rahe sine par
hae dil mein koi arman liye jate hain


kya pata un ko kitaben hain ki wish ki pudiyan
bhar ke baste mein jo nadan liye jate hain
ye bhajan gane mein hi mast kiye band aankhen
aur ghar laut ke mehman liye jate hain


ek masum ka sar kat ke phir dewi se
apni khush-haali ke wardan liye jate hain
nim-behosh hai ghayal hai qafas mein 'panchhi'
aur par noch ke shaitan liye jate hain