وہ حسن جس کو دیکھ کے کچھ بھی کہا نہ جائے

وہ حسن جس کو دیکھ کے کچھ بھی کہا نہ جائے
دل کی لگی اسی سے کہے بن رہا نہ جائے
کیا جانے کب سے دل میں ہے اپنے بسا ہوا
ایسا نگر کہ جس میں کوئی راستہ نہ جائے


دامن رفو کرو کہ بہت تیز ہے ہوا
دل کا چراغ پھر کوئی آ کر بجھا نہ جائے
نازک بہت ہے رشتۂ دل تیز مت چلو
دیکھو تمہارے ہاتھ سے یہ سلسلہ نہ جائے


ہے کوئی کھیل جان گنوانے کا حوصلہ
خیر اب جو آ گیا ہے تو یہ مرحلہ نہ جائے
اک وہ بھی ہیں کہ غیر کا بنتے ہیں جو کفن
اک ہم کہ اپنا چاک گریباں سیا نہ جائے