wo jo har-waqt sochta hai mujhe
khud se bichhda hua mila hai mujhe

ek aahat si aati rahti hai
koi to hai jo dhundhta hai mujhe

apna aaghaz ho na ho lekin
apne anjam ka pata hai mujhe

gahre pani ki or badhte hi
khud-ba-khud dariya rokta hai mujhe

haal-e-dil jab sunana chaha to
us ne hans ke kaha pata hai mujhe

khud par aakhir ghurur kyun na karun
us ke har khwab ne chuna hai mujhe

aasman se utar ke chand 'saba'
de ke thapki sula raha hai mujhe