وہ جو کاسہ لیے ہر در پہ کھڑا ہوتا ہے

وہ جو کاسہ لیے ہر در پہ کھڑا ہوتا ہے
میں اسے روز بتاتا ہوں خدا ہوتا ہے
کتنے دروازوں پہ جھکتا ہے تمہیں کیا معلوم
وہ جو اک شخص کسی گھر کا بڑا ہوتا ہے


وقت پر کام نہ آ پائے تو بھائی کیسا
گھر میں رکھی ہوئی تلوار سے کیا ہوتا ہے
اس نے تعریف کے پتھر سے کیا ہے زخمی
یہ نشانہ بڑی مشکل سے خطا ہوتا ہے


عشق میں سر کبھی جھکتا ہی نہیں ہے نادرؔ
یہ وہ سجدہ ہے جو آنکھوں سے ادا ہوتا ہے