wo kab aaen khuda jaane sitaro tum to so jao
hue hain hum to diwane sitaro tum to so jao

kahan tak mujh se hamdardi kahan tak meri gham-khwari
hazaron gham hain anjaane sitaro tum to so jao

guzar jaegi gham ki raat ummido to jag uttho
sambhal jaenge diwane sitaro tum to so jao

hamein rudad-e-hasti raat bhar mein khatm karni hai
na chhedo aur afsane sitaro tum to so jao

hamare dida-e-be-khwab ko taskin kya doge
hamein luta hai duniya ne sitaro tum to so jao

use 'qabil' ki chashm-e-nam se derina talluq hai
shab-e-gham tum ko kya jaane sitaro tum to so jao