wo kah rahe hain jo humse KHuda ki hamd likhen

wo kah rahe hain jo hum se khuda ki hamd likhen
bataen kaun se kis ke khuda ki hamd likhen
bahut se ladte-jhagadte hue khudaon ki hamd
ki sab se dur akele khuda ki hamd likhen


jo aasman pe rah kar zamin pe hukm chalae
na hoga hum se ki aise khuda ki hamd likhen
khuda wo hai jo maze de hamein mohabbat ke
wo ho to aise maze ke khuda ki hamd likhen


khuda wo hai jo nashe mein hamesha dhut rakkhe
mile to aise nashile khuda ki hamd likhen
khuda wo hai jo bana ho hamari mitti se
to aise khak ke putle khuda ki hamd likhen


khuda wo hai jo laga ho hamare pahlu se
to jism-e-yar ke jaise khuda ki hamd likhen
hamein dilao khuda koi jism-o-jaan wala
ki jism-o-jaan laga ke khuda ki hamd likhen


ye gosht-post ka ma’shuq hai to phir 'ehsas'
ghazab ki ruh ke mare khuda ki hamd likhen