wo qafila aaram-talab ho bhi to kya ho
aawaz-e-nafas hi jise aawaz-e-dara ho

khamosh ho kyun dard-e-mohabbat ke gawaho
dawe ko nibaho mere nalo meri aaho

har roz jo samjhane chale aate ho naseh
main puchhta hun tum mujhe samjhe hue kya ho

is dar-e-baqa mein meri surat koi dekhe
ek dam ka bharosa hai jo ek dam mein fana ho

mujh ko na suna khizr o sikandar ke fasane
mere liye yaksan hai fana ho ki baqa ho