wo to hashr tha magar us ki ab wo shabahaten bhi chali gain
jo rahen to shahar mein kya rahen ki qayamaten bhi chali gain

tere dam se thin sabhi raunaqen wo habib the ki raqib the
wo qarabaten to gai hi thin wo riqabaten bhi chali gain

tera qurb garche tha jaan-gusil wahi qurb tha meri zindagi
tere baad marg-o-hayat ki wo rifaqaten bhi chali gain

meri aarzu thi ki jaan-ba-kaf meri justuju ki nafas ba-pa
ab ai zindagi mujhe chhod ja ki ye haalaten bhi chali gain

tu ne di jo dard ki daulaten wo ghazal ghazal na sama sakin
mere hath se tere husn ki ye wirasaten bhi chali gain

use dekh dekh ke sochna use soch soch ke dekhna
wo aziz kya ki aziz-tar kai aadaten bhi chali gain