wo zakhm phir se hara hai nishan na tha jis ka
hui hai raat wo barish guman na tha jis ka

hawaen khud use sahil pe la ke chhod gain
wo ek naw koi baadban na tha jis ka

kashid karta raha hijraton se dard ki mai
koi to tha ki kahin ham-zaban na tha jis ka

isi ke dam se thi raunaq tamam basti mein
ki khanda-lab tha magar gham ayan na tha jis ka

jali to yun ki hua rakh ang ang mera
ajib aag thi koi dhuan na tha jis ka